Båt

Ei kort historie om føringsbåten frå Mostraumen: I 1941 starta Andreas Solbakk og søner ”Tjeldstø slip- og reparasjonsverft”. Dei første åra gjekk med til opplæring, ombygging og reparasjonar av eksisterande båtar. Denne føringsbåten har byggenummer 1, og vart bygd i 1946/47. Oppdragsgjevar var gardbrukar J. Farestveit i Mostraum i Osterfjorden. Farkosten hadde ikkje noko namn, men vart kalla ”Storabåten” eller ”Kyrabåten”, fordi han i hovudsak vart nytta til å føra kyr og kalvar til og frå sommarbeite over ei fjordbukt. Båten kunne ta to vaksne kyr på ein tur, og dei stod i kvar sin retning i lasterommet. Grimene deira vart surra fast i tofte eller tverrgåande stokk framme og bak. På kvar side la ein langsgåande stokkar inntil dyra slik at dei ikkje skulle gå ut i sidene. Opphavleg var båten utstyrt med fire keipar og to par årer, og han vart rodd av 2–3 personar. Omkring 1970 byrja brukarane å nytta motoriserte småbåtar til å slepa ”Storabåten” med.

I 1974 vart det utført ei større vøla på farkosten, mellom anna utskifting av bord utvendig og plank i lasterommet. Sidan garden heile tida har vore utan vegsamband, vart båten også brukt til å frakta ved, materialar, høy, sand og singel. Han var i bruk til midten av 1980-åra. ”Storabåten” hadde eige naust med slipp og vart i hovudsak sett inn etter kvart bruk. Etter at gardsdrifta vart avslutta i 1989, har han stått under tak. Sommaren 2003 fekk Kystmuseet overta båten.

Produksjon: 1946 - 1947

Bruk: 1947 - 1980

Eierskap: 1947 - 2003